1/1
қаралды 993

Қаланы қақ жара, солтүстіктен оңтүстікке созыла Назарбаев және Абылай хан даңғылының қиылысында қала тұрғындарының сүйікті бір орны – Мақтай тауы орналасқан. Аталған екі көшенің қиылысын Қылшақты өзені тұйықтайды. Жан-жағымен үндестік тауып, жымдасқандай жарасқан, қолдан қаланған тау Бурабайдағы кәдімгі Оқжетпеске ұқсайды. Аты аңызға айналған, басына бұлт үйірілген шың сексен шақырым жол жүрмей-ақ, жаныңнан табыла кетеді. Кәдімгі кіші Оқжетпес! Дәл сол Бурабайдың тақта тастары адам қызыққандай қиюласа өріліп, өрнек құрады. Екі адамның құшағы жетпес, пішіні «домалақ» деуге келмейтін, жайыла біткен табиғаттың осынау бір сыйын бұл өңір сандықтас деп атайды. Тастардың жұмырлана біткен жиектері шығып-түскенге қауіпсіз.

«Мақтай тауы» сонау 80-ші жылдардың ортасында, Мақтай Сағдиев Көкшетау обкомының бірінші хатшысы болып тұрғанында, сол кісінің тапсырмасымен салыныпты. Әдейі атау қойылып, айдар тағылмаса да халық солай атап кеткен. Ал, өзге өңірде ұшыраса бермейтін осынау сүрініп-қабынтар қыры, ұшы жоқ жұмыр жаратылған тастар Қошқарбай ауылының іргесінен тасылып әкеліпті. Міне, көкшеліктердің мақтаны Мақтай тауының осындай шағын тарихы бар.

Сізге сондай-ақ ұнауы мүмкін