Батыр Киікбай Байғараұлы кесенесі Атбасар ауданы Сергеевка ауылында орналасқан. Жоңғар шапқыншылығы заманында өмір сүріп, жаугершілікте қаза болған Байғараүлы Киікбай – Қытай, Моңғолияда өмір сүретін қазақтар арасында есімі таныс тұлға. Киікбай батыр шамамен XVII ғасырдың соңында Қалба өңірінде дүниеге келіп, 1740 жылдары Арқа жерінде қаза болған. Ұрпақтан ұрпаққа ауызша жеткен шежіре деректерде Арқалықтың Алғадай, Ақөзен деген өлкеде көшіп-жайлап жүргенде өмірден өткендігі айтылады.

Абзал бабамыз үш жүзге «Киікбай шешен» деген атпен белгілі болған. Өйткені бала жасынан ел сөзіне араласқан би, шешен, әділ қазы болыпты. «Киікбай би айтыпты» дейтін төмендегідей өлең жолдары ел аузында кең тараған:

Ауылым — атам, білімім — бойымдагы бабам,

Салтанатым — сабырым, сүзіп сөйлейтін сөзім,

Нан табарым нәрім,

Жанашырым – жарым мен анам, бақытым – балам.

Бұл -менің толганым, армансыз болғаным.

Ал ел ішінде «Киікбай» жайлы айтылатын мынадай аңыздар бар. 1723 жылғы ашаршылық, ақтабан шұбырынды жаугершілік кезде туған тұңғыш баласының атын арықшылық заманда туды деп – Арық, екінші баласының атын кұлдай жүдегенде туды деп Құл деп қойыпты. Бұл атағым ұрпағымның есінде жүрсін әрі үш балалы болып көбеңсіп қалдым деп үшінші баласының атын Көбеген қояды. Төртінші баласының атын жаудың беті кайтып тұрсын деп Оңбай қойыпты және Аман, Оман есімді қыздары да болған дейді. Киікбай ерте қайтыс болып, үйленген үлкен ұлы Арық өзінен кейінгі бауырларының басына үй тігіп, казан асып, әкелік қамқорлыкпен бөлек шығарып, өзі әке шаңырағына ие болған деседі.